فحطة ال بي سي والجديد بالمظاهرات والمتظاهرين خدعة مكشوفة

الياس بجاني/08 أيلول/15

يعني لازم يكون اللبناني مهبول وفاقد عقلو ومسطل ع الآخر تا يقبض جدية فحطة ومصداقية تلفزيون الجديد وقرينو بالهوى والنوى والتجارة تلفزيون ال بي سي بالمظاهرات وبالحقوق وبباقي معزوفة نفاق ودجل شعارات اغلبية يلي عم يتظاهروا من نجاح واكيم وشربل نحاس وغيرون هودي يلي صاروا ايتام وأرامل ومقطوعين بخروج الجيش السوري وربع عرفات من لبنان على الأقل عسكرياً وموت الحركة الوطنية ما غيرها.

صحيح هودي كلون وغيرون كتار عم يتاجروا مقاومة وتحرير وممانعة ليل نهار وبينفخوا بحزب الله والملالي ولكن الحزب اللاهي مش قابضون جد ومش معتازون بوجود أدوات ومرتزقة ع مستوى رفيع بكل الطوائف من أمثال عون ويلي من خامتو المعفنة ومنون رجال دين موارنة وغير موارنة كبار!! نعم تعتير ولكن هيدي حالتنا!!

يلي حابين نقولوه وبصوت عال إنو لا خينا بيار الضاهر يلي شفط تلفزيون بشير الجميل وسجلو باسمو، تلفزيون الشهداء والمقاومة المسيحية وحوله إلى عكس ونقيض كل شي فكر فيه وعملو بشير وعملو عدو لكل شي استشهد من اجله شهيد لا يمكن يكون فجأة صار طوباوي وبيموت بلبنان وبحقوق ناسه وعطلان هم الزبالي. هيدي القصة مش راكبي ولا بتركب ع عقل. أكيد، خينا بيار شاطر ولكن شطارتو هالمرة مكشوفي ومكشوفي كتير كتير.

أما عمنا تحسين الخياط صاحب تلفزيون الجديد فحدث ولا حرج وآخر همو لبنان واللبنانيين والزبالي والزبالين وما في داعي نفوت بالتفاصيل لأنو تلفزيونو بيحكي كل يوم الحكاية من طقطق للسلام عليكم.

عن جد وبصراحة، يلي عندو عقل ومش مأجر ضميرو أو قاتلو مش معقولي يكون مصدق فحطة الجديد وال بي سي بالمظاهرات،

وكمان  لا يمكن يكون مغشوش بنوم كميراتون ومراسلينون بساحتي الشهداء ورياض الصلح.

هيدي مسرحية هزلية وأكبر حفلة ستربتيز فاضحة للنوايا الخفية ويلي بالحقيقة مفضوحة ومعراية ع الآخر.

المطلوب إنو ما حدا يقبض ويصدق فحطة ال بي سي والجديد بالمظاهرات والمتظاهرين وبالزبالي والروايح.

والأهم ما يقبض الهمرجي هيدي بغير اطارها يلي الكل بيعرفوا ويلي هو: كل شي بحقوا وع قد الدفعة منقوي أو منخفف العيار.

مين يلي عم يدفع ويمول؟

مش كتير مهم لأنو دائماً في مين بيدفع، وفي كمان يلي دكتون رخوي وريلتون قاشطا ومشرشرا ومستعدين يقبضوا ويبيعوا حتى حالون!!

وكان الله بعون أهلنا المعترين والواقعين بأيدي زعماء وسياسيين ورجال دين لا بيخافو ربنا ولا عاملين حساب ليوم الحساب.

بالخلاصة ربنا الشايف كل شي وهو  بيحاسب، وأكيد راح يحاسب كل يلي عم يتعدوا على لبنان وعلى اللبنانيين وع الأرزات المقدسين وع دم الشهداء وع التاريخ والكيان والرسالة.

وهو سبحانه إن أمهل فلا يهمل.

 

*الكاتب ناشط لبناني اغترابي

عنوان الكاتب الألكتروني

phoenicia@hotmail.com