جمهورية البرواز

بقلم/شارل عقل

مع أنى كنت عارف انـّو الفراغ بَلعْ الرئيس!

وعارف أنو قصر بعبدا فرّغوه حتـّى من لحود!

لكن ما كنت عارف إني رح أنصدم بهالشكل..

لمن دخلت باب السفارة، وشفت البرواز فاضي...

حروب طائفيي!

حروب مع الفلسطينيي!

حروب مع السوريي!

حروب مع الإسرائيليي!

حروب مع طواحين الهوا!

و كل صدمات ال38 سنة، ما هزّتني بقدر ما هزّني البرواز بدون صورة الرئيس...

14 آذار كانت ثورة الشعب على ساسة الخنوع و التزلف..

تبنـّاها بعض الزعما، يلـّي حسّو على دمّنْ..

وهاجمها البعض الآخر، يلّى بكل وقاحا بيفتخرو بصداقة العدو الحاقد..

و الحلو اليوم إنو العدوّين عم يتصالحو، والزعما مختلفين، والشعب مقسوم..

والثورة ضاعت..

والحَكـَمْ برواز فارغ...

ميشال سليمان اليوم مرشح اجماع..

لكن ما حدا رح يسترجي ينتخبو..

مناورة، لعبة خطرة، او اوامر من برا؟

تعددت الأسباب و الفراغ واحد...

زعما السياسة بلبنان عندن قصر بعبدا..

والظاهر إنو رح يبقى فاضي..

نحنا عِنـّا السفارات اللبنانية بكل دول العالم..

مين بيقبل يضَلّ فيها البرواز فاضي؟

من هون بوَجّه نداء لكل لبناني بالعالم، وكل منظمة او حزب لبناني عندن حسّ بالوطنية، إنو يتكاتفو و ياخدو قرار بالدخول على حرم كل السفارات اللبنانية بالعالم بدون التعرض لأحد، بتاريخ واحد وساعة وحدة، لوضع كرسي عليها صورة الرئيس ميشال سليمان، بغض النظر عن تأييدنا لشخصو ام لأ، لإنو الوحيد القادر على إنقاذ الرئاسة،و من بعدا بنفكـّر بالجمهورية...

بتمنّى على كل من يوافق على هالخطوة، انو يردّ على هالصفحة، تنكمـّل ثورة الأرز يللي عملوها اهلنا بالداخل، على امل توعّي المسؤولين، قبل ما يصير اسم لبنان على خريطة العالم..

برواز فاضي...

4/1/2008