بقلم/
شارل عقل
ضحكت لمن
سمعت اليوم
إنـّو نوابنا
بدّن يتـّهمو
لحود بخرق
الدستور!
وين يا نوّاب
بعد في
دستور.....؟
لمـّن
الرئاسة
الاولى
والرئاسة
التانية
وجزء كبير
ممن يدّعو
الوطنية!
عم يرتكبو
الخيانة
العظمى!
بتعاملن مع
يللي احتلّ
البلد 30 سنة
وبكل وقاحة
بدن يألفو
حكومة سورية
بلبنان.....
وما حدن بيقللن
محلى الكحل
بعيونكن!
ما حدى
شايف انن عم
بيحررو شبعا
من ساحة
البرج؟؟؟
طنجرة فيها
طبخة محروقة!
حتى لو
العماد عون
قِبل يكون غطى
لهلطنجرة!
شوشطت وطلعت
ريحتها...
قبلن كانت
طريق فلسطين
بدّا تمرّ من
جونية!
ِندمو
وخِسرو
واعتذرو...
لا تذكـّرو
ولا تعلـّمو
ولا قبلو
يغـّيرو الطنجرة
ويغـّيرو الطباخ!
وهالغطا ما رح يفيدن...
السيد حسن
نصرالله كان
زعيم لبناني
بإمتياز
نصّ لبنان
كان يحبو
وربع لبنان
كان معو
والربع
التاني ما كان
بيكرهو...
صار بدّو،
الموت لإسرائيل
والموت
لأميركا!!
بالوقت
يلـّي معلّمو السوري
عم يترجى
اسرائيل واميركا
تيقبلو يصالحوه
بدون شروط!
ميشال عون
كان زعيم
لبناني
بإمتياز
رجع على حصان
ابيض
والكل عم
يفتحلو
الطريق
فرشولو
السجاد
الأحمر
وماعجبو!
صار بدّو
يستحلّ
السرايا
ويطيـّر
الحكومة
نسي قديش
بكي، وبكانا
معو
لمّا نعَمل فيه
نفس الضرب؟
او إنـّو
الـّي نعَمل
فيه كان صحّ؟
او إنو يلـّي
هوّي عم يعملو
غلط؟
ما حدن غيرو
فيه يجاوب ...
إنو يا
جماعة!
لبنان في
عندو لعنة على
زعمائو؟
يا أما
بينقتلو
يا اما
بينجرّو، او
بينغرّو؟
بنرجع بنقول:
الحق مش
عالنواب
ولا
عالزعما...
الحق الوحيد
عالشعب.
حاجي بقى
يشكو وينعو
هنـّي يلـّي
بيعملو زعيم
وهنـّي بسّ
يلـّي
بيجردوه من
زعامتو...
شو خصّن
بالصراع
العربي
الإسرائيلي؟
شوخصّن
بالصراع
العربي
الفارسي؟
شو خصّن
بالصراع
الأميركي
الشرق اوسطي؟
وين حضارة شعبك
يا لبنان
العظيم؟
وين عظمة زعمائك
يا شعب لبنان؟
ضاعو الزعما!
وضيعو الشعب!
ورح يضيع
كل لبنان...
جمهور
المقاومة، رح
يسترجعو شبعا
إذا سقّـطو
الحكومة؟
وجمهور
الجنرال متأكدين!
إنو ما رح
يكبـّولن ميّ
مسقعة بعد ما
تخلص وظيفتهن؟
كنت بتمنى لو
14 اذار قبلو
بميشال عون
رئيس جمهورية
تا يتأكد
الجنرال
إنـّو لحود ما
بيتنازلـّو!
و إنـّو بس
عم يستعملوه...
والحقيقة
إنـّو لحود
وبشار
يا
بيضلـّوعالكرسي
سوا
يا بيروحو
عالمحكمة
الدولية سوا...
المطلوب من
كل الشعب
اللبناني
يرجع عبيتو.
يفتش على
لقمة لولادو.
يرجعهن
عالمدارس
حاجي دايرين
بالطرقات...!
هيك بس بتوقف
كل الصراعات
الخارجية
و بيرجع كل
زعيم لحجمو...
فاتت
اسرائيل!
كلـّن مضيو 17
أيار!!
فاتت سوريا!
كلـّن مضيو
اتفاق
الطائف!!
مرّة وحدة
إجت الفرصة!
تنعمل اتفاق
لبناني!
بدون
اسرائيل ولا
سوريا!!
بطـّل حدن بدو يمضي...
وصلنا لوقت..
سوريا عندا
ايدين جوّا!
اسرائيل
عندا ايدين
جوّا!
جيوش العالم
صارت كلها
جوّا!!
ونحنا واحد ورا واحد
عم نهرب
لبرّا!!!
و بعدو الشعب
بيحتل
الساحات
بدل ما يحتل
شبعا!
وبعدو
بيزمّر
للزعما
بدل ما
يحاسبن!
وصار يتظاهر ضد بعضو!
بدل ما يتظاهر
ليسأل:
كرمال شو
فقدنا ميات
الالوف من الشهدا؟
كرمال شو
تهدّمت
البيوت؟
كرمال شو
خسرنا عشرات
المليارت؟؟؟
كان عنـّا
بلد وعنـّا
شعب!
صار عنـّا
شعبين!
ورح يبطل
فيه بلد!!!
املنا
الوحيد، بقاء
هالحكومة!
عطوها فرصة
كم شهر!
يا بتنجح
وكلنا
بنزمّرلا!
يا بتفشل
وكلنا
بنحاسبا...
وصدقوني، بس يصير فيها
حساب!
لا حدن بيغلط
ولا حدن
بيبيع
ولا حدن
بيخون...
وللحكومة
بقول:
لأول مرّة
بتاريخ لبنان
العالم
كلـّو
بيدعمِك!
يا أما اليوم
بتاخدي قرار
مصيري
وبتسمّي كل
مين بيتعامل
مع خارج حدود
لبنان!
بالفكر او
العمل او
النيـّة!
خاين........
يا أما ذنب
لبنان و شعبو
برقبتك الى
ابد الابدين
24/12/2006