اكتِمال النصاب وطرد النصابين

بقلم/ شارل عقل

 

صرلن جمعتين، عم بيحللو مبادرة نبيه برّي!

مع إنو ما بدا تحليل!

كل القصة إنو الرئيس النبيه!

اخترع فتوى قانونية لمنع اكتمال النصاب...

 

واخترع فتوى جديدة..

تمنع حدا تاني يترأس الجلسة...

 

رجع قللن تعو نتحاور!

قال على رئيس توافقي!!

و تا يكمل التوافق..

أعلن حزب الله إنو الجنرال، هوي المرشح الوحيد للمعارضة!!!

 

وطبعا الجنرال فرح..

مفتكرهن عم يخدموه..

منوعارف انن دحشوه عصاية،بدواليب التوافق...

 

كيف توافق؟

وكيف مرشح واحد؟

وكيف 14 آذار بعدو عم بيرد عليهن؟؟

 

نحنا الشعب العادي، ما بنفهم قانون..

لكن بنعرف إنو انتخبنا نايب ليمثلنا..

وبنعرف إنو معاشو، من الضرايب يللي نحنا عم ندفعا..

بيقدر ينتخب ضد إرادتنا، وعذرو مقبول لأنو نحنا مقسومين..

وبيقدر ينزل ورقا بيضا، وهيك ما بيزعل حدا..

أما إنو يتقاعص عن واجباتو، ارضاءً لدولة، أو فزعا من دولة تانية..

هيدا صار خيانة عظمى، واعتبارو مطرود هوي ابسط الحلول...

 

طبعا ما حدا رح يهتم برأي مواطن عادي..

لكن بتمنىّ من جهابذة القانون انن يلاقو مادة بالدستور، بتسمح لنايب، إنو يتغيب عن جلسة، تعقد حكماً، بدون عذر شرعي...

 

إلا إذا كانت التنحرة عذر شرعي..

أو العهر السياسي عذر شرعي..

أو التحالف السياسي مع دولة تانية عذر شرعي...

 

حاجي بقى يفتشو عن مخارج للنصاب!

في جلسة بتنعقد حكماً، قبل 10 ايام، و يا ريت بيشرحولنا شو يعني حكماً؟

يللي بيحضرا، بيكون هيدا مية بالمية نصاب..

ويللي ما بيحضرو بيكونو نصابين و طردن من المجلس حلال...

 

وعلى سيرة الطرد..

وبمناسبة ذكرى استشهاد الرئيس بشير الجميل..

قصة زغيرة بتغني عن شرح كتير..

يومها متل اليوم، كان في محسوبيات..

يعني ليللي ما بيعرف؛ موظفين بيقبضو معاشات، وهنّي قاعدين ببيتن..

 

يللي بكرا ما بينزل على وظيفتو، بيعتبر مطرود..

هيك قال الرئيس بشير الجميل..

تاني يوم، بالصدفة نزلت عالبلدية تا أعمل رخصة صيد..

لقيت البلدية مزروكة بالعالم، و ما في مجال للدخول إلا بعجيبة..

سألت القهوجي يللي بكعب البناية: شو في مظاهرة اليوم؟

قللي هودي موظفين عم بيفتشو على مكاتبن و فزعانين ما ينطردو...

 

يا ريت اليوم، موظفين البرلمان، بينزلو يفتشو على مكاتبن بالمجلس ويمارسو واجبن، وإذا اليوم ما في بشير يحاسبن، كل واحد منا بكرا بشير ورح نمسح فيهن الارض إذا لبنان، دخل بالفراغ...

 

 شارل عقل 07/9/18