حكاية مقاومة

بقلم/ شارل عقل

 

بين حرب الشمال و حرب الجنوب..

عملو الشعب سندويش..

 

وبين الفرس والعرب...

عملو البلد سندويش..

 

وبين الحوار والتشاور..

عملو الزعما سندويش..

 

وبين التفاوض والتسوية..

عملوالقانون سندويش..

 

سبحان اللي خلقو لبنان!

كلن بدن منو كدشة..

بسّ طلع قاسي علىسنانن..

والي حاول يبلعو!

طلع تقيل على معدتو..

 

حتى اللي قال:

اصغر من ان يقسّم واكبر من ان يبلع!

شط ريقو عالوليمة..

وقرر ياكل من لحمو الحي..

ويشرب من دمو..

لمن بلش يلحس مبرد المقاومة!!!

 

المقاومة هيي موضوع اليوم...

 

خلينا نرجع شوي بالتاريخ ..

تنزكر يللي نسيو..

سو هيي المقاومة؟

 

بلشت المقاومة اللبنانية سنة 1969..

على كوع الكحالة..

لمن القرار السياسي حيـّد الجيش اللبناني..

وكان النظام السوري يومها..

وبعدو لليوم..

عم بيهرب سلاح..

لأعداء لبنان...

 

كان يومها في حفنة من الظباط!

اللبنانيي الشرفا!

عم بيسـّربولنا المعلومات!

تركنا جامعاتنا!

وتركنا اشغالنا!

وتركنا بيوتنا!

وانتدبنا نفسنا جيش بديل!

وبلـّشنا المقاومة...

 

قاومنا الجيوش الجايي من برا..

قاومنا العقايد الجايي من برا..

وقاومنا التدخلات الجايي من برا..

 

سنة ال73!

منعنا الفلسطيني من وصل..

مخيم تل الزعتر بالنبعة!

استعدادا لوصلو..

بمخيمات الغربية!!

 

سنة ال76 !

لمن قرر الفلسطيني..

يحرر القدس من جونيه!

مسحنا وجودو المسلح من مناطقنا...

 

وهيدي كانت معجزة المقاومة اللبنانية...

 

ما حدى صدق..

انو شوية شباب و بنات!

بدون سلاح من برا..

بدون مال من برا..

بدون قرار من برا..

 

هزمو اضخم معسكر بالشرق!!

 

جنّ السوري بوقتا!

 

لدرجة انو قدر يقنـّع زعمائنا..

بوقف المعركة!

وبالفعل صدر الأمر..

من الجبهة اللبنانية!

ومن القوات اللبنانية!

بوقف المعركة!!

ليتمكن السوري..

من اللعب بورقة الفلسطيني..

داخل مناطقنا!!

 

رفضنا الأوامر..

ومسحنا الوجود الغريب المسلـّح..

من تلّ الزعتر وجسر الباشا والنبعة!

 

وتاني يوم..

وكمان بدون اوامر!

عملنا اضراب عام!

من شكا للأشرفية..

ضدّ الدخول السوري!

يللي كان لابس تياب..

قوات الردع العربية!

 

وقبل ما غابت الشمس..

طلعنا على بعبدات..

لنمنع دخول القوات السورية!

 

ومع انو ما بقي منا اكتر من اربعين عنصر!

لكن سجـّلنا للتاريخ!

انو في حفنة من المقاومين..

كانو ضد الدخول السوري!

وبعدن لليوم!

هنّي وولادن!!

ضد الدخول و التدخل..

من اي دولة..

عربية كانت او عجمية...

 

هيدي حكاية بداية المقاومة اللبنانية!

يللي رفضنا بوقتها..

تسميـّتا القاومة المسيحية!

حفاظا على شعور شركائنا بالوطن!!

 

نشأت بالمنطقة الغربية..

افواج المقاومة اللبنانية..

ورتها الاستاذ نبيه بري..

بعد غياب الإمام موسى الصدر..

 

صار الإستاذ يتردد عالشرقية..

طلبا للمساعدة!

لبـّينا النداء يومها..

على قدر الإمكان..

 

لكن سوريا فاتت عالخط..

وتبنت الإستاذ وحركتو..

وضاع الإستاذ..

بين افواج المقاومة اللبنانية..

وافواج تلبية حاجات سوريا!!

 

كانت المصلحة وحدة!

بين سوريا واسرائيل!

بإنهاء ابو عمار!!

 

ولمن ما قدرت سوريا..

تقضي على عرفات..

دخلت اسرائيل بجيوشا..

وانهت الوجود الفلسطيني المسلح..

من الشريط الحدودي ..

الى قلب بيروت...

 

ولمن نزاحت الغمة عن اهل الجنوب..

بلش الصراع بين العرب و العجم..

للسيطرة على الورقة اللبنانية..

ترجموها بحروب طويلة..

بين افواج المقاومة اللبنانية ..

والمقاومة الإسلامية في لبنان...

يللي انشأتها ايران في الجنوب!

بشرط ان تتولى بيع المنتجات الإسرائيلية في الأسوق العربية!!

 

نجحت ايران بالتجربة الأولى!

وغرّقت الأسواق العربية بمنتوجات اسرائيلية!

تحت اسم صنع في ايران!!

 

بسنة ال2000..

تمـّت الصفقة التانية..

وبسحر ساحر!

تسلمت ايران الحدود مع اسرائيل!

وبقي حزب الله 6 سنين.

ناطور على حدود اسرائيل!!

 

بهالوقت شَرّف شبل ألأسد..

وكان مفتكر الشرق ملك بيو..

بلش يخربط مع الكل..

لدرجة انو قـَتـَل الحريري...

 

وبقي مكفى بتخريب لبنان..

وبقي ينزل مع كل غلطة..

وقبل ما يوصل لكعب البير..

مدّت ايران الحبلة..

وسحبتو...

 

ومن بعد ما كان بيو عصاية عالشرق..

صار هوي عصاية بإيد ايران..

لمن بدا!

بتكسر هالعصاية!

لتعمل الشرق نفس عجمي!!

 

الحلف الإيراني اسوري الجديد..

جمع الكلمة والباودي..

بين امل و حزب لله..

وهيدا لبـّك اسرائيل..

 

رجعتهن عالليطاني!

وبدل ا تكون المقاومة..

ضد اسرائيل..

صارت ضد اللبنانيي..

 

ومتل ما المقاومة خسرت الآرض..

من شبعا لليطاني..

خسرنا نحنا الحرية..

من بعبدا..

لعين التينة...

 

وهون الحق عالدولة..

وجماعة الأكترية..

لأنن عرفو يبلشو..

بس اعرفو يخلصو...

 

حَطـّو اربع ظباط بالحبس!

لأنن متـّهمين بالتواطؤ!

وكمان متـهمين!

بتنفيذ رغبات الشقيقة!!

 

يعني الشقيقة بطـّلت شقيقة!

واللي معها لازم ينحبس!

 

طيب كيف زعما المعارضة؟

يللي عميتباهو بصداقتها!

بعدهن فالتين؟

وبعدن عم بيطالبو بالوزارة؟

وبعدا الدولة عم بتحاورهن؟؟

 

سمير جعجع كان!

اقوى منن اليوم مجتمعين..

ما حدى منكن فزع..

دكـّيتوه بالحبس 11 سنة..

معليش اذا اليوم..

كمان ما فزعتو..

ودكـّيتو شي 11 زعيم..

عالقليلة..

كل زعيم بسنة..

وهيك ساعتها بتصير..

لا غالب ولا مغلوب...

 

شارل عقل 22\3\2007

Charles1951@hotmail.com