راحت علينا

بقلم/شارل عقل

كل وسائل الإعلام بلبنان، وخلال معركة نهر البارد، سََّوقو المعركة على إنها بين الجيش و عصابة شاكر العبسي!

متل كأنو مقطوع من شجرة، مع كل ما كان عم يوصلـّو من دعم، مادي و بَشَري و لوجيستي!

مبارح، وليد المعلم فرجانا سحنتو البهية تيقول: مبروك لجيش لبنان انتصارو!

طبعاً لعب الفار بعبّنا، لكن ما كانت مفاجأة بقدر صدمة اليوم..

مؤتمر اليوم الصحفي، ضيـّع علينا لذة الإنتصار..

الوزير يللي مَسمِحلو يعمل سياسة، ما بَرّأ حدن ولا إتهم حدن..

و كان خطابو مقبول...

أما ضباط الجيش الأشاوس، يللي ممنوع يلعبو سياسة، تنَطَـّحو تنَيننْ، و تسابقو تيعطو سوريا صك البراءة!!

و يمكن بعتولا سلة ورد، مع بطاقة شكر!!

وطبعاً كل هيدا والتحقيق بَعدو بأوّلو!!

لمين هالرسالة موجهة؟

إذا كانت للقاعدة، ليش تيجيبو الدب على كرمُن، والعنب عنا مبحبح..

إذا كانت للشعب، بدّن يسمحولنا فيا، ما رح نبلعا..

إذا كانت للعالم، بتصوّر المسؤولين واعيين أكتر منن..

أما إذا كانت لسوريا، شو هوّي التمن يا شباب؟

ليش التناقض بين السلطة السياسية، والسلطة العسكرية؟

ليش جَيَّروا الإنتصار لسوريا؟

وليش عم يحرمونا و لو لمرة، إنو نفتخر بجيشنا؟

الغزل الفرنسي السوري!

مبادرة نبيه بري!

تصريح وليد المعلم!

صك البراءة لسوريا!

تصريح خافيير سولانا!

هيدي كلها علامات خطر على ثورة الأرز، برسم زعما الثورة، إذا بعد فيه زعما!!

تذكرو لمن الجنرال، قِبِل سيترنات البنزين من ايلي حبيقة، بالوقت يللي كان بدو يكسر راس حافظ الأسد، وبعد مدة فاتو على قصر الشعب عسكرياً!

براءة سوريا اليوم، من قِبل ضباط الجيش، بالوقت يللي ربحنا فيه معركة نهر البارد، رح تفتحلن الباب تيفوتو على قصر الشعب سياسياً!!

ما بدنا نربح مخيم زغير تنخسر بعدو استقلالنا..

ولا بدنا يجي يوم نقول فيه للجنرال:

كان معك حق...

5 أيلول 2007